 |
| حقيقة انتقال ميسي لمانشستر سيتي في الميركاتو الشتوي |
مع اقتراب فتح باب الانتقالات الشتوية، زاد الكلام في وسائل الإعلام عن احتمالية انتقال النجم الأرجنتيني ليونيل ميسي من نادي إنتر ميامي الأمريكي إلى مانشستر سيتي الإنجليزي على سبيل الإعارة.
أزمة السيتي واستغلال فترة التوقف
السيتي بيعاني حاليًا من تراجع كبير في نتائجه الموسم ده، وده باين في ترتيبه السادس في الدوري الإنجليزي وخسارته 9 من آخر 12 مباراة في كل البطولات، مع فوز وحيد بس.
على الناحية التانية، الدوري الأمريكي حاليًا متوقف لحد فبراير 2025، وده اللي فتح باب التكهنات حوالين احتمالية استعارة ميسي لمدة 6 شهور لتدعيم الفريق.
رغم كل الكلام ده، مفيش أي تأكيدات رسمية بخصوص الصفقة لحد دلوقتي، بس مواقع رياضية عالمية زي "سبورتس كيدا" نقلت إن مدرب السيتي، الإسباني بيب غوارديولا، مهتم بضم ميسي في يناير لتعديل مسار الفريق.
الموقع أشار إن علاقة غوارديولا بميسي من أيام برشلونة، لما كانوا مع بعض بين 2008 و2012، وحققوا وقتها نجاحات كبيرة، منها 14 بطولة، أبرزهم 3 ألقاب دوري إسباني و2 دوري أبطال أوروبا.
موقف إنتر ميامي وبيكهام
في المقابل، في كلام إن ديفيد بيكهام، الشريك في ملكية إنتر ميامي، ممكن ميكنش عنده مانع لو وصل عرض رسمي لاستعارة ميسي.
أرقام ميسي مع إنتر ميامي
ميسي، اللي عنده 37 سنة، كان متألق جدًا الموسم اللي فات مع إنتر ميامي، حيث سجل 23 هدف وصنع 13 هدف في 25 مباراة، واختير أفضل لاعب في الدوري الأمريكي، بعد ما قاد فريقه للفوز بدرع المشجعين لسنة 2024.
ميسي والسيتي.. قصة ارتباط قديم
مش جديد إن اسم ليونيل ميسي يتربط بمانشستر سيتي، النادي الإنجليزي حاول أكتر من مرة يضم النجم الأرجنتيني لصفوفه، وده من أيام ما كان بيلعب مع برشلونة، لكن القصة دي بدأت تاخد أبعاد مثيرة أكتر في 2020، لما اندلعت أزمة كبيرة بين ميسي وإدارة برشلونة برئاسة جوسيب ماريا بارتوميو بعد الهزيمة المذلة قدام بايرن ميونيخ 8-2 في دوري أبطال أوروبا.
في كتاب "حفظ الله بيب" اللي كتبه الصحفي الإسباني مارتي بيرارناو، اتكشفت تفاصيل مثيرة عن محاولة ميسي الانتقال للسيتي في صيف 2020، مارتي حكى إن ميسي بعت رسالة لـ بيب غوارديولا على "واتساب" وقال فيها إنه متضايق جدًا من الوضع في برشلونة، وعايز يعرف إذا كان فيه فرصة إنه يشتغل معاه تاني.
المحادثة دي أثارت اهتمام كبير في مانشستر سيتي، خصوصًا لما سيرجيو أغويرو، صديق ميسي، قال لزمايله في الفريق: "خدوا بالكم، فيه حاجة كبيرة ممكن تحصل، وليو سألني عن مدة بقاء بيب في النادي".
قليلة.
رغم كل المحاولات دي، ميسي في الآخر اختار الانتقال لباريس سان جيرمان في 2021 بصفقة انتقال حر بعد انتهاء عقده مع برشلونة، وقضى هناك موسمين قبل ما يسيب أوروبا في 2023 وينتقل لإنتر ميامي.
دلوقتي، وبعد تراجع أداء السيتي في الموسم الحالي، رجعت الأخبار تربط ميسي بالعودة لأوروبا من بوابة مانشستر سيتي.
السؤال اللي بيطرح نفسه: هل ممكن الصفقة دي تتحقق أخيرًا ويشوف العالم غوارديولا وميسي مع بعض من جديد؟